لما تكون شغال بزمه . خايف علي مصلحة الأمة
شغلك يطلع من غير لزمه . علشان ما بيعلاش غير واطي
طاطي راسك طاطي طاطي . إنت في وطن ديمقراطي
ولما شقاك يصبح مش ليك . فقرك سد السكه عليك
تتلفت تلقاه حواليك . إما حرامي أو متعاطي
طاطي راسك طاطي طاطي . إنت في وطن ديمقراطي
ولما الجهلة يبقوا أمامك . أو فوقك ماسكين في زمامك
ويسوقك ع الهلكة إمامك . تشرب من السم السقراطي
طاطي راسك طاطي طاطي . إنت في وطن ديمقراطي
ولما الكلمه تكون بتدينك . لما تخبي في قلبك دينك
لما الذل أشوف في عينك . هات إحباطك علي إحباطي
طاطي راسك طاطي طاطي . إنت في وطن ديمقراطي
ولما حاميها يكون حراميها . وبلاده ورا ضهره راميها
طالع نازل واكل بيها . مسنود بالبدله الظباطي
طاطي راسك طاطي طاطي . إنت في وطن ديمقراطى
Comments (0)